(“Front end developer” olmaq istəyirsiniz, amma haradan başlayacağınızı bilmirsiniz? Sizi anlayırıq. İnternetdə saysız-hesabsız məlumat var və bu, çox vaxt qarışıqlığa səbəb olur. “Front end developer nədir?”, “Front end bacarıqları hansılardır?”, “Fronted nedir?” kimi suallar beyninizi məşğul edirsə, doğru ünvandasınız. Bu yazıda sizə front end sahəsində lazım olan əsas texniki və qeyri-texniki bacarıqlardan bəhs edəcəyik. Məqsədimiz – sizi maarifləndirmək və doğru istiqamətləndirməkdir.
1. Front end nədir və bu sahədə nə iş görülür?
Front end — istifadəçinin bir veb sayt və ya tətbiqdə gördüyü və qarşılıqlı əlaqədə olduğu hissələrdir. Buraya menyular, düymələr, animasiyalar, şəkillər və digər interfeys elementləri daxildir. Front end developer isə bu vizual komponentləri kodla yaradan şəxsdir. Onlar həm dizaynın düzgün göstərilməsinə, həm də saytın funksional işləməsinə cavabdehdir.
Bu peşə həm texniki bilik, həm də dizayn hissi tələb edir. Əgər həm yaradıcı, həm də analitik düşüncəyə sahibsinizsə, bu sahə sizin üçün ideal ola bilər.
2. Əsas Proqramlaşdırma Dilləri: HTML, CSS və JavaScript
Front end sahəsində ilk addımı atmaq istəyən hər kəsin öyrənməli olduğu üç əsas texnologiya var: HTML, CSS və JavaScript. Bu dillər bir veb saytın “skeleti”, “görünüşü” və “hərəkətini” təmin edir.
HTML (HyperText Markup Language) – saytın əsas strukturunu yaradır. Burada başlıqlar, paraqraflar, şəkillər, linklər və formalar yerləşdirilir. Yəni saytın nəyi harada göstəriləcəyi HTML ilə müəyyən edilir.
CSS (Cascading Style Sheets) – bu strukturun üzərinə vizual qat əlavə edir. Rənglər, ölçülər, şriftlər, məsafələr və hətta animasiyalar CSS ilə verilir. CSS olmadan sayt düz, estetikadan uzaq görünər.
JavaScript isə bu iki texnologiyanın verdiyi görüntüyə həyat qatır. Məsələn, istifadəçi bir düyməyə klik etdikdə formanın açılması, slayderin dəyişməsi və ya məlumatın ekranda dinamik göstərilməsi – bunlar JavaScript sayəsində mümkündür.
Bu üç texnologiya olmadan bir veb sayt tam funksional ola bilməz. Eyni zamanda, bu dillər React, Vue, Angular kimi müasir kitabxana və framework-lərin də təməlində dayanır. Ona görə də istər təcrübəli olun, istər yeni başlayın – bu dillər sizə uzun yol yoldaşı olacaq.